Teño o firme convencemento de que cociñeiro máis cunqueirián de cantos andan por Galicia é Pedro Roca e estou seguro de que o mindoniense apreciaría a cociña deste ferrolán asentado en Compostela tanto coma o cociñeiro aprecia a obra do escritor. Roca segue a ser un dos tesouros escondidos da cociña galega, probablemente polo seu cará
cter inicialmente retraído, retraemento que desaparece en canto se establece a menor relación con el. Dicíamo a redactora de TVE que nos entrevistou a ambos para o telexornal galego, a canle 24 horas e o programa “España en comunidad” (TVE 2).
Cando vin sobre a mesa o menú cunqueirián que Pedro montara para as tomas da televisión decidín que había que probalo o antes posible. As fotos son a mellor proba deste menú, que se ofrece por 35 euros máis bebidas: ostra en escabeche, xoubas con pementos sobre broa, vieira, rape á primavera (o menú inclúe rodaballo salvaxe, pero ese día acabárase), bertón recheo, colineta e requeixo da Capela.
Xoubas
Vieira
Rape
Bertón
Colineta - requeixo
O requeixo será o protagonista o próximo domingo na Capela (A Coruña), coa celebración da 21 edición da Festa do Requeixo e a sexta edición do concurso de receitas con requeixo da Capela.
Na festa haberá requeixo a esgalla ¡e do bo! que malo na Capela non saben facelo. E música, moita música, con Leilía, Vaamonde, Lamas e Romero, a banda de Narón e a banda de gaitas Basilio Carril. Tamén haberá humor coas Cantareiras de Ardebullo… e pregón a cargo de Miguel Vila, que promete ser breve para non aburrir ata ás vacas.
Hai poucos días escribía sobre o requeixo con motivo da presentación do libro “Receitas con Requeixo” publicado pola cooperativa Campo Capela (non esquezades que teño un exemplar para sortear entre os comentarios publicados en Colineta) e hoxe volvo a facelo para presentar unha nova marca de requeixo galego: Lácteos Anzuxao.
Anzuxao é unha fabrica artesanal de queixo acollido á denominación de orixe Tetilla, pero que tamén produce queixos semicurados, tipo país e baixos en graxa, así coma o requeixo, que leva no mercado poucos días.
O requeixo de Anzuxao está a medio camiño entre o producido por Campo Capela, Arquega ou Lorán, máis líquidos, e o feito pola cooperativa do Condado-Paradanta en As Neves, que resulta moito máis sólido que o de Anzuxao, elaborado no concello pontevedrés de Lalín.
Este novo requeixo conserva tódalas cualidades de sabor e aroma do requeixo tradicional, pero resulta menos acedo que as outras marcas o que, xunto coa textura, o fai distinto aos comercializados ata o de agora. Se antes tíñamos no norte requeixo para comer con culler e no sur para facelo con garfo, agora temos a medio camiño esta nova marca que serve para unha cousa e outra.
Polo momento Anzuxallo produce menos de 100 quilos semanais de requeixo, elaborado con leite pasteurizada das súas propias vacas. Pero non o busquen en tendas e supermercados porque non van dar con el: so se vende por encarga e lévanllo á súa propia casa. Pódese pedir ao teléfono 986 794 135. Polo momento serven a toda a provincia de Pontevedra, a metade sur da Coruña, a zona de Chantada en Lugo e parte de Ourense.
Sobre o requeixo levo moito escrito e falado, pero queda moito por dicir ata conseguir que un produto tradicionalmente galego sexa aceptado por dereito propio no mundo da alta gastronomía e dos produtos de gran calidade que producimos no país. Vai sendo hora de que a consellería de Medio Rural se quite as orelleiras que ata o de agora non lle deixaban ver máis queixos galegos que os catro que teñen denominación de orixe, porque o certo é que hai máis, pero ningún tan galego e de calidade coma o requeixo, sexa o da Capela ou o das Neves, o de Arquega, o de Lorán ou calquera outro que se produza no país.
Tradicionalmente o requeixo consómese en Galicia como sobremesa, sen máis engadido que un pouco de azucre ou, se cadra, mel. Pero hai moitas outras fórmulas para este especial queixo fresco, tanto doces como salgadas. A última vez que me emocionou probar unha nova foi no taller impartido por Pedro Roca no programa Santiago Repetirás. As súas canas recheas de requeixo fixeron as delicias de tódolos participantes.
Pois algunhas desas fórmulas estupendas para consumir o requeixo doutra maneira están agora reunidas no libro “Receitas con Requeixo”, editado pola Cooperativa Campo Capela e presentado onte na sede da propia Cooperativa.
O libro reúne un total de 30 receitas de cociñeiros ben coñecidos coma o citado Pedro Roca ou Beatriz Sotelo (a Madrid Fusión levou o salmón mariñado con requeixo da Capela e encurtidos cuxa receita está no libro). Hai tamén receitas dos cociñeiros de tódolos restaurantes e casas de turismo rural existentes no concello da Capela, así como da panadería do mesmo e outros restaurantes clientes da cooperativa. E finalmente unha ducia de receitas de afeccionados participantes no concurso de receitas de sobremesas que cada ano organiza o Concello. Unha boa maneira de achegarse a este produto descoñecido para moitos.
Colineta ten un exemplar do libro para agasallar a un dos seus lectores. Sorteareino o próximo 21 de xuño entre tódolos comentarios marinado dende hoxe ata ese día.
Pode que unha das procesións máis grandes deste venres en Galicia fose a de As Neves. Unha procesión pagá motivada pola festa do Requeixo e o Mel que reuniu na localidade pontevedresa miles de persoas ávidas de probar este queixo fresco tan galego, malia que siga sen ter recoñecemento oficial de ningún tipo. So, con azucre, con mel da Paradanta ou con marmelada, o requeixo foi aperitivo para moitos e sobremesa para os que antes pasaron probar o polbo ou os chourizos fritos ou ao viño, exclusivos estes para pecadores. Os viños da zona, Rubiós e Tortoreos, foron bos acompañantes para a festa, á que incluso acompañou o tempo xa que en toda a mañá so caeron unhas ameazadoras pingas que non foron máis que iso, unha ameaza. Contra a noite o requeixo volverá a ser protagonista, desta volta en compaña do viño tinto de Rubiós (D.O. Rías Baixas).. Os visitantes das Neves puideron ademais mercar as típicas roscas destas datas, que en boa parte de Galicia os padriños están obrigados a regalar aos seus afillados. E rosquillas, empanadas, carne para o caldo e o cocido, pan… eu merquei un estupendo pan de ovos da zona, que amosarei noutro post.
O requeixo e o mel do Condado e A Paradanta, no sur da provincia de Pontevedra, estarán de festa ao longo de toda a Semana Santa, con mesas redondas, cursiños e degustacións. É a XVIII Festa do Requeixo e do Mel.
O programa gastronómico comeza o luns 6 de abril cunha mesa redonda sobre “Produtos artesáns e desenvolvemento do territorio” na que participarán representantes de Leite O Alle, galletas mariñeiras Daveiga, Asociación Galega de Turismo Rural, Cooperativa de Viño de Rubiós, adegas A Luz e a cooperativa do Requeixo e o Mel das Neves.
O martes haberá un cursiño de cociña con requeixo.
E o venres será o día grande da festa, con feira e degustación de requeixo. Pola mañá acompañado de mel da zona, e pola tarde cos viños de Rubiós. O programa completo da festa pódese ver na web do Concello de As Neves
As denominacións de orixe naceron nun principio para amparar unicamente viños, e naceron nunha época en que Europa, o seu berce, saía da época da posguerra, unha época na que antes que calidade había que producir cantidade para abastecer a toda a poboación.
Daquela A Mancha producía mares de viño dunha calidade máis que dubidosa e certamente moi afastada dos logros dos últimos tempos nesta árida zona. Na verde Galicia dominaba o viño revolto, que hoxe é patrimonio practicamente exclusivo de Cataluña, porque en Galicia xa practicamente non se ve máis que nalgunhas, que non todas, das contadas tabernas que quedan no país. Non sei se en Cataluña seguen aínda no revolto ou volveron a el buscando unha suposta orixinalidade do produto. Suposta, digo, porque aquel viño revolto era froito dunhas malas prácticas vitivinícolas.
Os ovos fritos con patacas e chourizo que preparou Xosé Cannas no Forum del Mar de Cambrils empregando iogur, mango e amorodos lembráronme outros ovos fritos para a sobremesa que facía miña cuñada en Castropol, na beira asturiana da ría de Ribadeo.
O requeixo será o protagonista o próximo domingo na Capela (A Coruña), coa celebración da 21 edición da Festa do Requeixo e a sexta edición do concurso de receitas con requeixo da Capela.
