Colineta adiantou en exclusiva hai uns días a apertura do restaurante compostelán Pedro Roca, que nos acompañou o pasado domingo en Arroz con Chícharos (Cadena Ser Galicia, 12,30 horas), do que podemos saber máis lendo a entrevista que hoxe publica La Voz de Galicia.
O que non conta nesta entrevista Pedro é que pensa recuperar para os restaurantes de alta cociña ese vello costume compostelán de poñer callos os xoves. E os mércores cocido.
“Los jueves milagro” era o título dunha película de Luís García Berlanga que da un titular estupendo cada vez que hai novas en xoves, así que non é a primeira vez que o emprego, inda que non sexa capaz de lembrar onde o fixen antes.
Este xoves, 11 de decembro, San Dámaso (Papa) e santos Paulo, Fidel e Masona, bispos, non haberá (¿ou si?) milagre en Compostela, pero o mesmo da, porque os amantes da boa mesa van ter oportunidade de asistir ao nacemento dun novo restaurante, un restaurante agardado por todos durante longos meses.
Pedro Roca deixa o Alameda para poñer a punto o seu propio restaurante, que abrirá en setembro na zona compostelá de Galeras
Os afeccionados á cociña mexicana teñen cita dende hoxe e ata o próximo sábado no compostelán restaurante Caney, situado nos baixos do hotel Araguaney. A Semana Gastronómica Mexicana traerá ata a capital de Galicia o mellor desa cociña tan descoñecida pola meirande parte do público, que so sabe dela, en directo, polos tacos e burritos dalgunhas franquías, e en diferido polo visto na película Como agua para chocolate.
Algúns dos grandes pratos da cociña do país centroamericano, que se amosaban na referida película, estarán presentes nas xornadas do Caney: chiles en nogada, mole poblano… pero na carta hai moito máis. Dez antojitos para entrantes, tres pratos de peixe, catro de carne e catro sobremesas, así como margaritas, tequila, cervexa mexicana…
O restaurante tamén ofrece un menú degustación que, por 32 euros, promete deixar satisfeito a calquera: guacamole con totopos, taco mexicano, enchilada, chiles en nogada, ceviche de peixe, huachinango veracruzano, mole poblano e jericalla.
O Caney xa celebrara con éxito unhas xornadas de cociña mexicana hai dous anos, cando aínda Pedro Roca estaba á fronte das súas cociñas. No Caney Roca fixo moi populares as xornadas de cogomelos, que se celebraban cada outono, así como as do arroz ou a cociña árabe.
