¿A cachola máis cara do mundo?

Tal e como van as cousas, a incipiente produción de porco celta pode morrer… de éxito.

Nesta semana tiven dous contactos cos seus produtos e ningún me deixou satisfeito por completo, non porque o produto sexa malo, senón polo mal trato que lle dan os tendeiros e polos prezos que acada.

A primeira experiencia foi o xoves na Praza de Abastos de Compostela. A segunda o sábado nunha tenda de produtos de calidade de Bertamiráns.

Nos dous casos o problema máis destacado é co xamón. En Bertamiráns estaba a 58 euros o quilo ao corte. Na Praza non tiña o prezo, nin tampouco vin a etiqueta do produtor, como si aconteceu no outro caso. O problema é que en ambos establecementos un xamón de tal prezo se corta coa máquina dos friames, que non me parece mal se empregue para cortar xamóns que se venden a 18 euros o quilo, pero verdadeiramente infame para un produto que se presume de primeirísima calidade.

Penso que o xamón de porco celta, o mesmo que o ibérico, se debe cortar sempre a coitelo, sistema que lle da ao xamón unha personalidade que perde por completo na coitela da máquina da mortadela. Temos produtos de primeira calidade e tendas de delicatassen, pero a profesionalidade dalgúns tendeiros segue ausente.

Non me parece moito o prezo do xamón de porco celta (na mesma tenda ofrecían ibérico a menos de 60 euros quilos), xa que se trata dun produto de calidade, e ademais escaso, pero cobrar a cachola do mesmo animal a 12 euros o quilo é fariña doutro costal.

Media cachola de porco celta (3,8 quilos): 46 euros… de ósos e touciño fundamentalmente. Algunha febra haberá, pero ben escasa. Xa sei que ese touciño ten que ser fantástico, pero son moitos euros de graxa.

3 comentarios sobre “¿A cachola máis cara do mundo?

  • el 28 de octubre de 2007 a las 09:14 09Sun, 28 Oct 2007 09:14:50 +000050.
    Permalink

    Nunha das primeiras experiencias de produción de derivados cárnicos do porco celta á que eu asistín como técnico hai xa algúns anos, e que non veu a luz comercial, non por falla de calidade, por certo, senón -coma case sempre- pola falta de seriedade dos candidatos a produtores de materia prima, todos os participantes tiramos alguinhas conclusións (Tratábase de porcos criados en liberdade e con alimentación baseada en castaña e mazá, complementada con pensos naturais de base cereal):
    . Non caso das salgaduras nobres (fundamentalmente xamón, con curación naturales de arredor de dous anos), os niveis de calidade en cata eran intermedios entre un recebo e un ibérico criado con landra.
    . O prezo de saída en industria fixado polo industrial en base aos seus custes estaba entre 15 e 18 euros, o que o convertía en altamente competitivo.
    . Os chourizos que probamos tiñan unha calidade enorme, pero por cuestión de porcentaxe de graxa non poderían ser tipificados como extra, e mesmo tiñan dificultades para ser primeira.
    . En canto ao resto dos produtos, salgadura semifresca etc, tiñan que ser tratados comercialmente a niveis similares aos dos produtos tradicionais de porcoo branco, porque non se daban condicións para sobreprezos.
    Dito esto, concordo totalmente con vostede: se a unha interesante inciativa de produción diferencial como é o porco celta se lle van aplicar os mesmos criterios especulativos aos que desgraciadamente estamos afeitos os consumidores de produtos galegos, o conto acabará en floklórico, anecdótico e “para gourmets”. Alá eles.

    Respuesta
  • el 28 de octubre de 2007 a las 12:19 12Sun, 28 Oct 2007 12:19:02 +000002.
    Permalink

    Sen dúbida, a calidade dos produtos de porco celta é extraordinaria. O mesmo o xamón que a cachola, ou os embutidos que teño probado, e que xustifican prezos altos.
    O que non se xustifica é a falta de profesionalidade dos tendeiros.
    Respecto dos embutidos de porco celta, penso que algúns fabricantes están querendo ser tan puristas que abusan do fume o mesmo que se abusaba hai, por exemplo, cen anos, cando fume e sal eran o único sistema de conservación. Non creo que o galego medio actual estea preparado para tanto fume, e dende logo aos de fora de Galicia, afeitos a chourizos que non se afuman, tanto fume ten que rallarlles abondo.
    Claro que aínda se está a tempo de rectificar…

    Respuesta
  • el 29 de octubre de 2007 a las 18:07 06Mon, 29 Oct 2007 18:07:19 +000019.
    Permalink

    Pois eu digo o contrario. Cada día é mais dificil atopar chourizos afumados como dios manda. Imos á dictadura do curado por frio.

    Respuesta

Deja un comentario

Tu dirección de correo electrónico no será publicada. Los campos obligatorios están marcados con *