“Paréceme que aló pola primeira metade do século XX houbo algunha experiencia cun viño escumoso en Galicia. Pero igual o soñei…”. Por unha vez o texto entre aspas é meu propio. Trátase da resposta a un comentario publicado nun post sobre os escumosos galegos.
Non, non o soñara. Ordenar papeis ten a vantaxe, ademais de permitir limpar o po da mesa se traballo, que inevitablemente se transfire ás mans e aos pantalóns (”serás cetrenos”, diría miña mai se me vira), permite atopar papeis que un xa non lembraba.
Eu non lembraba a fotocopia daquela carta ao director, publicada en La Voz de Galicia hai algúns anos e na que se da conta do Gran Champagne Gulías, que fabricaba por terras de Ourense hai xa máis dun século, o arquitecto Manuel Vázquez Gulías.
Segundo contan na web de Beariz, a súa vila natal, as levaduras viñan dende París por vía marítima.
