Sempre pensei que dispoñer dun produto de excelente calidade era un requisito básico para a alta cociña. E sigo pensando o mesmo malia que algúns se empeñen en dicir o contrario.
Escoito aos cociñeiros máis famosos de España e do mundo enteiro falar da importancia do produto nas súas elaboracións e de como se volven tolos por atopar cada día materia prima excelente.
Pero despois algúns veñen a Galicia e o discurso cambia: os cociñeiros galegos teñen una dificultade engadida para facer alta cociña, que non é outra que a enorme calidade da nosa materia prima, din. ¿En que quedamos, arre o xo?.
O primeiro que tal dixo, hai xa algún tempo, foi Sergi Arola nunhas declaracións ao xornal, pero nos últimos días lin o mesmo argumento dúas veces: a primeira a Albert Adriá, a segunda en Gastroeconomía, un dos blogs do xornal Expansión.
E quédame a dúbida de si para destacar na alta cociña é mellor ter á man produtos de mediocre calidade ou convén irse a un lugar onde estes abunden. Tamén se suben ou baixan ¡e iso que non son galegos!
