En outubro o Atlántico e o Mediterráneo estarán conectados a través do Fórum del Mar que terá lugar en Cambrils (Tarragona)

Galicia será o territorio convidado no Fòrum del Mar, que se celebrará na localidade de Cambrils (Tarragona) do 26 ao 28 do próximo mes de outubro, promovido polo Patronat Municipal de Turisme e organizado pola empresa Pep Palau, von Arend & Associats, que tan bo sabor de boca deixou en Galicia coa organización do Forum Gastronómico Santiago’08, promovido por la empresa municipal de turismo de Santiago de Compostela.

Inda que o Fórum del Mar se entenda como unha xornadas de gastronomía mediterránea, Galicia estará presente, representando ao Atlántico e permitindo establecer unha ponte gastronómica entre o océano que baña as nosas costas e o mar Mediterráneo.

O Fòrum del Mar ten como obxectivo establecer un punto de encontro entre cociñeiros e produtores, fundamentalmente pequenas empresas artesanais e pequenos produtores agroalimentarios caracterizados pola calidade das súa producións. Neste marco, os produtores galegos poderán amosar unha ampla gama de produtos do noso mar, caracterizado pola súa diversificación e calidade.

O Forum terá un día aberto ao público xeral (26 de outubro) no que haberá demostracións de cociña en directo e degustacións populares. O público xa terá actividades nos días anteriores ao Forum, cunha sardiñada popular e a Festa del Peix Mecánic, consistente na degustación dunha especie de fideuá elaborada co fumet obtido a partir do coñecido como peix mecánic.

Os días 27 e 28 estarán destinados aos profesionais, que disporán de tres espazos diferenciados: escenario, aula e mercat del mar.

No escenario terán lugar as sesión de cociña a cargo de cociñeiros de diversa procedencia, na aula realizaranse degustacións de produtos e viños de Tarragona e o mercat del mar será un espazo para expositores.