Neste final de primavera artistas e deportistas apuntáronse á moda de pousar espidos para reivindicar todo tipo de cuestións. O último, que eu saiba, foi o tenista Fernando Verdasco, que se deixou fotografar so cunha raqueta para unha campaña contra o cancro. Pouco antes Elsa Pataki saiu espida nun número da revista Elle dedicado á auga, que estará de moda durante todo o verán non so pola tempada de baños senón tamén pola Expo de Zaragoza.
E antes deles dous a cantante Alaska tamén se puxo en porreta para apoiar unha campaña contra as corridas de touros, causa á que de paso tamén me apunto. (Non é por cotorrear, pero dame a min que na foto de Alaska hai moito photosohp).
Así que tal e como anda de animado o patio, ¿por que non uns cociñeiros e cociñeiras tapando as vergoñas cunhas lampreas ou unhas cunchas de vieira, poño por caso. Antecedentes non faltan, que xa un cociñeiro cambadés ensinou as cachas o ano pasado nunha campaña de recollida de fondos para unha entidade benéfica.
